مشروبات الطاقة !! في آخر 4 سنوات انتشر بشكل رهيب مشروبات الطاقة بين الأطفال تحت سن 10 سنوات وبين المراهقين تحت 18 سنة، ودا بسبب ظهور مشروب لشركة عالمية يُباع بسعر جيد لينتشر بعدها بشكل كبير داخل أعماق مصر.
فكرة مشروبات الطاقة تعتمد في الأساس على إضافة مادة الكافيين إلى المشروب الغازي المعتاد مع إضافة نكهة مميزة للمنتج.
الكافيين معروف بوظائفه التنشيطية للمخ وزيادة الانتباه والتركيز والنشاط .. ومن هنا أصبح لدينا مشروب للطاقة.
ولكن تعالوا نتعرف على حاجتين: أول حاجة: ما هو الحد الأقصى المسموح به للكافيين في اليوم؟ ركز معايا الجرعات دى مش احتياج يومي انت لازم تاخدة لا لا .. دى اقصى جرعات مسموحة ليك فى اليوم يعنى مينفعش تعديها .. ركز معايا كدا ايه هيا بقى الجرعات القصوي فى اليوم من الكافيين.
الأطفال والمراهقين: 200 مجم من الكافيين في اليوم. البالغين (فوق 18 سنة): 400 مجم من الكافيين في اليوم. الحامل: 200 مجم من الكافيين في اليوم. مرضى الضغط: 200 مجم من الكافيين في اليوم.
خلي بالك: دي الجرعة المسموح بيها في اليوم كله يعني بتتاخد على مدار اليوم. وبالتالي مفيش حاجة اسمها شاب بالغ ياخد الـ 400 مجم كافيين المسموح بيهم في اليوم مرة واحدة فى نفس الوقت. لأن في نفس الوقت هيظهر عليه أعراض زيادة الكافيين في الجسم: تبدأ بألم في المعدة، ثم ضربات قلب سريعة، وزيادة في ضغط الدم، مع زيادة الشعور بالتوتر وكثرة التبول.
ثاني حاجة: تعالوا نتعرف على تركيزات الكافيين في المشروبات:
☕ الدبل شوت إسبريسو (60 مللي) فيهم حوالي 90 مجم كافيين. ☕ فنجان القهوة التركي (غير المفلتر يعني بالوش) حجم 85 مللي (الحجم المتعارف عليه في مصر) فيه حوالي 75 مجم كافيين. 🍵 كوب الشاي الأسود ال 150 مللي (ودا حجم الكوب الزجاجي المتعارف عليه فى البيت) فيه حوالي 40 مجم كافيين. 🥤 كانز الكولا 355 مللي فيها حوالي 40 مجم كافيين.
هنتكلم هنا عن 3 انواع من مشروبات الطاقة عشان نختصر الكلام والأرقام كلها من العبوات نفسها وهي مكتوبة تقدر تراجع بنفسك الأرقام.
اول منتج وهو المنتج العالمي "الفضي/أزرق" اللى يعتبر هو أول منتج مشروب طاقة انتشر بشكل كبير .. واللي هنرمز له بالحرف "R"
ثاني منتج وهو الأحمر اللي انتشر خلال اخر 4 سنوات من خلال اعلان لممثل معروف وهنرمز له بالحرف "S"
المنتج الثالث الأصفر وهو المنتج الكارثي اللى معانا انهاردة ومنتج منتشر بشكل كبير خلال اخر سنة وهنرمز له بالحرف "F"
ولو ركزت هتعرف انا اقصد ايه بالمنتجات الثلاثة لأني اخترت اول حرف من اسم كل واحد فيهم.
مشروب الطاقة فى المنتج "R" حجم العوبة ال 250 مللي فيها 80 مجم كافيين فى الزجاجة الواحدة.
مشروب الطاقة فى المنتج "S" حجم الزجاجة 275 مللي فيها 70 مجم كافيين في الزجاجة الواحدة.
اما مشروب الطاقة الكارثي "F" حجم الزجاجة 400 مللي فيها 128 مجم كافيين فى الزجاجة الواحدة.
يعني المشروب الواحد من مشروبات الطاقة يساوي نفس كمية الكافيين اللي في الدبل شوت إسبريسو او اكثر.
وهنا نقول ان مفيش اى مخاطر لو واحد بالغ أخده مرة الى مرتين في اليوم،
لكن لو طفل شرب المشروب دا مرتين فى اليوم واستمر عليه ؟
فى المرة الواحدة بياخد نصف الحد المسموح بيه ودي جرعة عالية عليه في المرة الواحدة وهتسبب له أعراض زيادة الكافيين
❌ ودا السبب اللى بيجعل مشروبات الطاقة غير مناسبة للأطفال والمراهقين تحت ال 18 عام، وكمان غير مناسب للحوامل.
ليه بقى؟ لأن الطفل بياخد في المشروب الواحد نصف الجرعة المسموح بيها يوميًا، ولو قدر يتحمل الأعراض وكرر المشروب بشكل يومي → هيدخل في حالة تعوّد على الكافيين، زي تعود النيكوتين كدا "التدخين" وميقدرش يستغني عنه.
فتخيل معايا: طفل بياخد 2 مشروب طاقة في اليوم لمدة أسبوعين، كدا وصل للحد الأقصى يوميًا وكمان اتعود على الكافيين. زى بالظبط التدخين؛ بيبقى محتاج بشكل يومي ياخد الكافيين اللى اتعود عليه، وصعب انه يوقفة لانه هيحس دائماً انه مقريف ومش فى الموود.
⚠️ الخطورة مش بس في الجرعة اللي ممكن يتحملها، ولا كمان في التعوّد على الكافيين، كمان فى خطورة ان الاستمرار على الكافيين بيزود فرص التهاب المعدة والمريء وظهور ارتجاع في المريء.
دا كدا الكافيين اللي اتبنت عليه فكرة مشروب الطاقة، لكن هل هناك مواد أخرى داخل مشروبات الطاقة:
بالفعل هناك مواد آخري الهدف منها بيكون تسويقي او إضافة مواد للتركيبة تظهر انه منتج غريب الأطوار .. وهنا الحديث هياخدنا على مركب التاورين
فما هو التاورين (Taurine) ؟ التاورين هو حمض أميني من النوع الكبريتي amino sulfonic acid، موجود في الأكل زي اللحوم والأسماك، وكمان بيتصنّع طبيعي في جسمنا.
بداية معرفتنا بالحمض دا كانت لما تم استخراجه لأول مرة من العصارة الصفراوية bile لحيوان الثور، اللي اسمه باللاتيني Taurus، وبالإنجليزي Bull أو Ox، واللي اتبنت عليه فكرة وشكل أحد البرندات المشهورة.
التاورين ليس منشط زي الكافيين، لكنه له دور مهم في وظائف الجهاز العصبي، ووظائف القلب والأوعية الدموية، وكمان بيقلل من الإجهاد والشعور بالتعب.
التاورين موجود بتركيز عالي جدًا في المنتج العالمي المشهور "R" اللي اتبنى عليه الاسم، بتركيز 1 جرام يعنى 1000 مجم في الزجاجة (250 مللي).
المنتج "F" بيحتوي الزجاجة ال 400 مللي على 400 مجم تاورين ودا تركيز معقول.
أما في المنتج "S" فهو موجود بربع التركيز دا (200 مجم في 275 مللي). ورغم انه ربع التركيز فقط ولكن المنتجين نفس التأثير على الطاقة لأن الاثنين فيهم نفس نسبة الكافيين والسكر اللى هم الأصل فى الطاقة اما التاورين لا علاقة له بشكل مباشر بالطاقة.
لو تحدثت معك بإنصاف عن التاورين بشكل علمي، فهقولك إننا بناخد احتياجنا منه من الغذاء، وكمان بيتصنّع داخل الجسم، ومفيش أي حاجة بتخلينا محتاجين ناخده من المشروبات.
وحتى لو اتاخد في المشروبات، فهو ملوش علاقة بالطاقة؛ وجوده هدفه تسويقي 100%، خاصة إن بداية ظهور التاورين او ظهور المعلومات عنه كانت ضعيفة وقت انتشار البراند، يعنى بكل بساطة مادة جديدة محدش يعرف عنها حاجة لسا لو قلوت لك هتخليك تطير هتصدقني .. وبالفعل ناس كتير اعتقدت إنها مادة سحرية وكمان اتقال عليها تستخرج من السائل المنوي للثور ودا طبعاً كلام غير علمي فهو مركب يتم تصنيعة.
وفى النهاية نقدر نقول ان السر في الطاقة في الكافيين مع السكر داخل المنتج.
مش بس كدا .. لم تكتفي المنتجات بذلك، لكن المنتج الشعبي "S" بيضيف مادة الجينسنج. ومن المعروف إن الجينسنج من أقوى الأعشاب المحفزة والمجددة لنشاط الدورة الدموية، لكن إضافته هنا في المشروب بتركيز ضعيف جدًا وغير مؤثر، بهدف تسويقي ليس أكثر.
المشروب (275 مللي) يحتوي فقط على 3.8 مجم من الجينسنج. هل تعلم إنك علشان تبدأ تحس بتأثير الجينسنج لازم تاخد 200 مجم يوميًا على الأقل؟ بالتالي، الـ 3.8 مجم مالهاش أي فائدة أو تأثير غير الدعاية !! تركيز لا يذكر لأن الجيسنيج غالي ويتم إستخراجة ولا يصنع وبالتالي لو عايز يضيفلك 200 مجم جنسينج فى المنتج انت محتاج تزود 10 جنية على سعر المنتج.
فهي نقطة تسويقية لا اكثر ولا أقل ..
وهناك إضافات أخرى زي الفيتامينات (B2، B3، B6، B12).
إضافة الفيتامينات دى الهدف منه دعائي أيضاً .. وذلك لإعطاء المنتج طابع صحي يغطي على أضرار المشروب الغازي والكافيين.
ده لا يقلل من أهمية الفيتامينات نفسها، لكنك بتحصل عليها طبيعي من الغذاء، وهي فعلًا ليها دور مهم في العمليات الحيوية في الجسم.
في النهاية، الطاقة مصدرها السكر والكافيين داخل المنتج.
كل الكلام دا ولسه ما اتكلمناش عن مخاطر السكر نفسه، لأن مشروب الطاقة يحمل نفس مخاطر المشروبات الغازية، لكن مع إضافة مواد أخرى زي الكافيين.
مشروب الطاقة الأصلي الغالي "R" فيه 27 جرام سكر فى الزجاجة ودا لأنه منتج عالمي بيحاول يوازن نفسة بين المنافع والمخاطر والأضرار فهنلاقي مستوي السكر والكافيين فى المعتدل
اما المشروب الطاقة ال "S" كمية السكر فيه 41 جرام سكر فى الزجاجة دى نسبة عالية
اما عن كمية السكر فى المشروب شعبي أخر "F" فيه 55 جرام سكر فى الزجاجة هنا نقول ان دا منتج كارثي
ولو انت مش متخيل فمعلقة الشاي مليانة فيها حوالى 5 جرام يعنى احنا بنتكلم فى أكثر من 10-11 معالق سكر فى الزجاجة الواحدة ...
يعنى كارثة الدخول فى مقاومة انسولين والإصابة بمرض السكر.
فلما نشوف أطفال عندهم 10 سنوات بيشربوا 2 أو 3 زجاجات مشروب طاقة في اليوم، ما نستغربش ليه اتعودوا عليه وحابين يشربوه بشكل مستمر!!
حافظوا على أولادكم .. وربنا يحفظهم 🙏
Nutritionist/Yassmin Ahmed
